Shirika la misaada la Oxfam limeonya kuwa kupunguzwa kwa misaada ya kibinadamu kutoka Marekani kunaweza kusababisha kifo cha mtoto mmoja chini ya umri wa miaka mitano kila baada ya sekunde 40 ifikapo mwaka 2030.
Kwa mujibu wa uchambuzi mpya uliotolewa na Oxfam, mabadiliko hayo yalianza mwaka mmoja uliopita baada ya utawala wa Rais Donald Trump kupunguza kwa kiwango kikubwa misaada ya kigeni, ikiwemo kufungia ufadhili wa kibinadamu na kufunga Shirika la Maendeleo la Marekani (USAID).
Oxfam inakadiria kuwa zaidi ya watoto milioni 4.5 wanaweza kufariki dunia ifikapo 2030 iwapo kiwango cha sasa cha ufadhili kitaendelea. Shirika hilo linasema watoto wapatao 200,000 walifariki mwaka 2025 pekee kutokana na kupungua kwa misaada, hali iliyoashiria ongezeko la kwanza la vifo vya watoto duniani katika karne hii.
“Miaka ya mafanikio inapotea,” alisema Rais wa Oxfam Marekani, Abby Maxman, akisisitiza kuwa watoto wanakufa kwa sababu zinazoweza kuzuilika iwapo misaada ya kuokoa maisha ingerudishwa.
Ripoti hiyo inaonyesha kuwa misaada ya kibinadamu ya Marekani ilishuka kutoka dola bilioni 14.1 mwaka 2024 hadi dola bilioni 6.4 mwaka 2025. Ingawa Marekani iliahidi dola bilioni 2 kwa Umoja wa Mataifa, Oxfam imesema kiasi hicho hakitoshi kufidia upungufu uliopo.
Athari za kupunguzwa kwa misaada zinaonekana katika nchi kadhaa ikiwemo Sudan Kusini, Ufilipino na Syria, ambapo huduma muhimu kama afya, elimu, maji safi na maandalizi ya majanga zimepunguzwa au kusitishwa.
Oxfam imetoa wito kwa Bunge la Marekani na serikali kurejesha ufadhili wa kibinadamu bila masharti ya kisiasa ili kuokoa maisha ya mamilioni ya watoto na familia zilizo hatarini.
